పిల్ల అవినీతికి చెల్లు.. బడా చోరులకు జైలు..

ఇంతకాలం ఏముంది లే అని అంతా వదిలేస్తూ వచ్చిన ఐదూ, పది అవినీతి, ఇంతింతై పెద్దగద్దల రూపంలో వందల కోట్లకు పడగలెత్తింది. సామాన్యుల స్వాతంత్ర్యం మళ్ళీ బందీ ఐంది.

ఈ పాపం ఎవరిది ?.. చిన్న మొత్తాల్లో అవినీతి పరులైన ప్రజలందరిది. అవకాశం ఉన్నా, ఓటు రూపంలో బలహీనతలకు ఓటు వేశారు. కొరడా దెబ్బలు పడాల్సిందే, తినాల్సిందే.
ఇప్పుడు ఖరారు అయ్యే శిక్షల వల్ల సమాజ స్పృహ ఉన్న ప్రతి మనిషీ పైసా అవినీతికి కూడా జంకే స్థితి తప్పనివ్వకూడదు.. ఈ జంకు జైలు భయం కాదు, ఇక్కడ మొదలైతే ఎంత దూరం పోతుందో, చేజేతులా నాశనం చేసుకోలేక.

ఒకనాటి చిన్న అలసత్వం ఇప్పుడు మహా వృక్షాలై నిల్చున్నాయ్. వేళ్ళతో సహా ఈ దుష్ట సామ్రాజ్యాన్ని కూల్చాలంటే ఒక్కొక్కరూ భగత్ సింగ్ లై నడవండి. చలి చీమల చేత జిక్కి చావదె సుమతీ అన్నట్ట్లు, ఈ స్వార్థపు నాయకత్వాలను చీల్చే శూలాలై సాగండి.

ఒక మనిషి ఆహుతి అయితే, ఒక ఊరు మునిగిపోతే, ఒక జిల్లా ఎండి పోతే నాదేం పోయింది అంటూ వస్తున్న నరం లేని సంకెలలు తెంచుకొని నడుద్దాం. ఇప్పుడు కాక పోతే ఇంకెప్పుడూ కాదు. లేచి కర్తవ్యంతో నడుద్దాం. ఇప్పుడు జరగబోయే ఒక్కొక్కరి పోరాటం నిద్ర లేస్తున్న సమాజానికి వెయ్యి ఏనుగుల శక్తి ఇస్తుంది. ఇక ఆగేది లేదు స్వాతంత్ర్యం వచ్చే వరకు,  ఆగేది లేదు అవినీతి చచ్చే వరకు..